Takksamt å sitja bak ein
tjukk vegg
og sjå på omverda
gjennom ein glugge,
livet
der utanfor får
skarpe konturar
og er velsigna
avgrensa,
gluggesyn reddar mange
frå å verta
dregne inn
i ein omskakande kvardag
der omverda er utflytande og
detaljane for mange;
skyttarar skal visstnok
setja pris på
gluggar.
Gul-brun bakke strekkjer seg
i landskapet,
heit sommar har sett sine
spor
i utkanten, under eit tre
vågar nokre grøne grasstrå
seg fram,
har gøymt seg i livd
til væte nok ein gong
har gjort grastilværet
leveleg
grøne grasstrå vaiar
i svake vindpust,
smyg seg fram,
sender varsam livsglede
inn i ein gul-brun
kvardag.
This website uses cookies. By continuing to use this site, you accept our use of cookies.
