Meir og meir
vert lenge sidan,
lenge sidan
eg var på fyrste
kappleiken,
på fyrste dansefesten,
på siste eksamensprøva,
lenge sidan fyrste arbeidsdagen,
lenge sidan eg gjekk ut
kontordøra
for siste gong,
me er mange
som tykkjer mykje
er lenge sidan,
me har ein ryggsekk full
av lenge sidan,
erfaring heiter det visst,
kunnskap om kva me gjorde,
den gongen,
for lenge sidan
lenge sidan gjev ramme for
nye dagar,
held oss på vegen,
får oss til setja pris på
dei jamne kvardagane,
di fleire me får med oss,
di meir innhaldsrikt vert
lenge sidan.