Forfatterarkiv: Magne Velure

Ventar på svar

Av og til gjer me det,
ventar på svar,
på søknad om arbeid,
på studieplass,
prøvesvar hjå dokter,
svar som grip inn i
livet framover,

venting er ei vanskeleg
øving,
alltid uroleg,
kjøvande usikker,
førebudd på det verste,
med ein tunn tråd
festa i ei skjelvande
von,

å venta på svar
driv dagane framover,
sjølv om spørsmåla
stundom vert
svarlause.

Fallande lauv

Tenk å vera
som eit fallande lauv,
tenkja seg inn i
kjensla
av å vera i fritt fall
svevande hit og dit,
sakte, sakte,
kjenna vinden endra retninga
av fallet,
ta ein ekstra runde
oppover i lufta
før kursen tvillaust
går nedover
landar mjukt i graset,
finn ut at det er
mange nedfalne lauv,
dei ligg tett, tett

skrekken er menn i gule vestar
dei kjem brølande med
lauvsamlarar
blæs lauva saman
i store, tettpakka
klaustrofobiske dungar

vona må vera å få liggja der
ein fall
ventande på
rim,frost og snjo,
denne kalde dyna som
gøymer ein frå
alt og alle,
kjenna korleis lauvstrukturen
etter kvart
berre vert jord,
når naturen vaknar til liv
til våren ein gong.